Аталған бастама аясында ҚР Қаржы министрлігі Мемлекеттік кірістер комитетінің, Қаржы мониторингі және Сыбайлас жемқорлыққа қарсы іс-қимыл агенттіктерінің, Бас прокуратураның, Ішкі істер және Қорғаныс министрліктерінің өкілдері, сондай-ақ қалалық және аудандық әкімдіктердің мамандары, полиция қызметкерлері, сот орындаушылары әрі белгілі отандық заңгерлер, нотариустар, медиаторлар және т.б. азаматтардың өзекті сұрақтарына жауап берді.
Осы акция арқылы Мемлекеттік кірістер комитетінің қызметкерлері салық мәселелері мен банкрот рәсімдеріне байланысты халыққа тегін кеңес берді. Салық жеңілдіктерін қолдану тәртібі мен салық міндеттемелері бойынша даулы жағдайларды реттеу жолдары түсіндірілді. Әсіресе бұған кәсіпкерлер мен өзін-өзі жұмыспен қамтыған азаматтар үлкен қызығушылық танытты.
Бұл іс-шараға МКК өкілдерінің қатысуы азаматтардың нақты мәселелерін жедел шешумен бірге салықтық әкімшілендіру саласындағы халықтың қаржы сауаттылығын арттыруға септігін тигізді. Оның ішінде салық заңнамасындағы жаңа ережелерді түсіндіру мен кәсіпкерлік қызметте жиі кездесетін кемшіліктердің алдын алуға ерекше назар аударылды. Өзара байланыстың мұндай форматы салық төлеушілердің көкейкесті мәселелерін жедел шешуде тиімділігін байқатты.
Биыл аталған жоба арқылы 100 мыңдай адамға тегін заңгерлік кеңес берілді. Адамдар салық даулары мен банкроттықтан бастап тұтынушылардың құқықтарын қорғау мен тұрғын үйге байланысты көптеген мәселе бойынша көмек сұрады. Осы ретте заңдағы өзгерістер мен бизнеске арналған мемлекеттік қолдау шараларына қатысты консультациялық кеңеске сұраныс жоғары болды.
«Халық заңгері» бастамасы Үкіметтің қолдауымен өткізілді. Ал оны ұйымдастыруға Сыбайлас жемқорлыққа қарсы іс-қимыл агенттігі, Әділет министрлігі, Zakon.kz порталы, «Параграф» ақпараттық жүйесі, Республикалық адвокаттар алқасы, мемлекеттік билік органдары, сондай-ақ Қазақстанның үздік заңгерлері мен адвокаттары атсалысты.
