Мемлекет басшысы 2021 жылғы 1 қыркүйектегі Қазақстан халқына Жолдауында 2025 жылдың соңына дейін барлық қала мен ауылды 100% сапалы ауыз сумен қамтамасыз етуді тапсырды. Осы тапсырманы орындау аясында бюджеттен 1 трлн теңгеден астам қаржы бөлінді. Нәтижесінде сумен жабдықтау қызметтеріне қала тұрғындарының 99,4%-ы және ауыл халқының 97,8%-ы қол жеткізе алады. Бұл туралы Орталық коммуникациялар қызметі алаңында ҚР Өнеркәсіп және құрылыс министрлігі Құрылыс және тұрғын үй-коммуналдық шаруашылық істері комитетінің төрағасы Бақытжан Жүнісбеков мәлімдеді, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
Спикердің айтуынша, бірінші кезекте халық саны көп елді мекендерге қаражат бөлінді. Осылайша, 10 өңірде және Маңғыстау облысы бойынша ауылдарда Мемлекет басшысының тапсырмасы орындалды. Сонымен қатар қалаларда ауыз сумен қамтудың ең төмен деңгейі Абай облысы және Қостанай облысының ауылдарында байқалады.
Ағымдағы жылы осы жұмыстарды жалғастыруға бюджеттен 410 жобаға 176 млрд теңге қарастырылған. Халқы аз ауылдарда бюджет қаражатын тиімді пайдалану үшін суды тазарту модульдерінің кешенді блогы орнатылады.
«Бұл ретте бүгінгі таңда 199 ауылдың тұрғыны өздерінің ұңғымалары мен құдықтарының болуына байланысты осындай қондырғылардан бас тартып жатыр. Мұндай елді мекендер бойынша әкімдіктер халық пайдаланатын судың сапасын айқындау мақсатында СЭС органдарымен бірлесіп, зертханалық зерттеулер жүргізу үшін сынамаларды іріктеп жатыр», – деді Бақытжан Жүнісбеков.
Комитет басшысы орталықтандырылған сумен жабдықтау жүйесі арқылы халыққа берілетін судың сапасы олардың тозу деңгейіне тікелей байланысты екенін атап өтті. Жыл сайын түрлі қаржыландыру көздері есебінен тозған учаскелер ауыстырылады.
Құрылыс және тұрғын үй-коммуналдық шаруашылық істері комитетінің ақпараты бойынша, ел бойынша желілердің жалпы ұзындығы 136 мың шақырымды құрайды, бұл ретте жалпы тозу деңгейі 49%-ға тең. Ал жылумен жабдықтау желілерінің тозуы 52%-ды, сумен жабдықтау желілерінің тозуы 39%–ды, су бұру желілерінің тозуы 55%-ды құрайды.
Айта кетерлігі, былтыр жылу желілері бойынша саясатты іске асыру міндеті Энергетика министрлігіне жүктелді.
