2024 жылы негізгі капиталға салынған инвестициялардың жалпы көлемі 19,4 трлн теңгені құрады, бұл 2023 жылға қарағанда 7,5% - ға артық. Инвестициялардың жалпы көлемінің ең үлкен үлесін жылжымайтын мүлік операциялары, тау-кен өнеркәсібі, көлік және қоймалау, өңдеу өнеркәсібі, энергиямен жабдықтау, білім беру, ауыл шаруашылығы сияқты салалар құрады. Бұл туралы ОКҚ алаңында ҚР Ұлттық экономика министрлігінің Инвестициялық саясат және қаржы секторын дамыту департаменті директорының орынбасары Бағлан Бақбергенов мәлімдеді, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
«Біз бұрын қабылдаған Инвестициялық саясат тұжырымдамасы аясында 2024 жылға 21,3 трлн теңге тарту міндеті тұрды. Бұл көрсеткіш 91%-ға орындалды. 7 өңір тапсырманы орындады. Бұл - Қызылорда облысы, Жетісу облысы, Қарағанды,Түркістан, Павлодар, Батыс Қазақстан және Маңғыстау облыстары. Көрсеткіш өңдеу өнеркәсібі, көлік және қоймалау сияқты салалар, сондай - ақ іске қосылатын тұрғын үй объектілері есебінен орындалды», - деді спикер.
5 өңір 90% және одан жоғары деңгейде орындауды қамтамасыз етті. Бұл - Солтүстік Қазақстан, Алматы, Қостанай, Шығыс Қазақстан облыстары және Алматы қаласы. 8 өңір 90% - ға жеткен жоқ. Негізгі себептердің қатарында қаржыландырудың жетіспеушілігі, инфрақұрылымның болмауы, жыл басындағы су тасқыны жағдайы бар.
«Биыл инвестициялардың 26,2 трлн теңге нысаналы көлеміне қол жеткізу үшін біз өткен жылдың қорытындыларымен салыстырғанда кемінде 35% өсімді қамтамасыз етуіміз қажет. 2024 жылы нысаналы индикаторлар бойынша ең нашар көрсеткішке жеткен жекелеген өңірлер 50% және одан жоғары орташа өсімді қамтамасыз етуі қажет. Мысалы, Ақмола облысы биыл нысаналы индикаторға қол жеткізу үшін 2024 жылға қарағанда 2 есе көп инвестиция тартуы тиіс», - деп толықтырды Бағлан Бақбергенов.
