Қызылордада «Жолаушылар вагондарын жөндеу, техникалық қызмет көрсету кешені және вагон құрастыру зауыты» жобасы жүзеге асырылуда

Жобаға 15,4 млрд теңге инвестиция тартылып, оны іске асыру екі кезең бойынша жүзеге асады. Бірінші кезеңде депода жылына 560 жолаушылар вагонын ағымдағы жөндеу, сондай-ақ 180 вагон жөндеу кешені жоспарланған, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.

Кешеннің жоспарланған қуаты жолаушылар вагондарын жөндеу мен қызмет көрсетуді жақсартуға, сондай-ақ жаңа үлгілер шығаруға мүмкіндік береді. Бұл Қазақстанда, оның ішінде өңірде теміржол көлігінің дамуына оң әсер етеді.

«Марал-Нұр» ЖШС шамамен 3,2 млрд теңге жеке инвестиция салды. Одан бөлек, жобаны «Даму» кәсіпкерлікті дамыту қоры» АҚ 2,2 млрд теңгеге қаржыландырды. Бірінші кезеңде нысан құрылысы 100% аяқталды. Қазір ішкі әрлеу жұмыстары жүріп жатыр. Жобаны 2025 жылдың ІІ тоқсанында пайдалануға беру жоспарланған.

Екінші кезеңде жаңа технологияларды пайдаланып вагон құрастыратын өндіріс құрылмақ. Кәсіпорын қуаттылығы – жылына 30-40 вагонды құрайды. Дайындық жұмыстары осы жылдың екінші жартыжылдығында басталады. Ресейден және ҚХР-дан жабдықтар сатып алуға қажетті 8 млрд теңге «Өнеркәсіпті дамыту қоры» АҚ арқылы қарастырылуда.