Бұл жүйе адвокаттық қызметті және заң кеңесшілерінің қызметін автоматтандыруға бағытталған. ҚР әділет вице-министрі Бекболат Молдабеков Орталық коммуникациялар қызметінде өткен брифингте жобаны жүзеге асыру барысы туралы айтты, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
Бекболат Молдабековтің хабарлауынша, азаматтарға «Е-заң көмегі» жүйесі арқылы көрсетілетін құқықтық қолдау процестерін автоматтандыруға баса назар аударылады.
«Е-заң көмегі» – бұл мобильді жүйе және оны жүктеп алуға кеңес береміз. Биыл оған көптеген пайдалы дүниені қосамыз. Бүгінде оператормен бейнеқоңырау, аудиоқоңырау арқылы тегін байланысуға болады. Оператор – кез келген сұраққа жауап беріп, түсіндіре алатын әділет жүйесінің қызметкері. Қазіргі уақытта 7075 пайдаланушы бар, бірақ олардың саны одан да көп болатынына сенемін», – деп атап өтті спикер.
Жалпы, вице-министр түсіндіргендей, жүйе азаматтарға 24/7 режимінде көкейіндегі құқықтық сұрақтарға жауап алуға мүмкіндік береді.
