ҚР Жоғары Сот Кеңесі жанындағы Сот төрелігі академиясының вице-ректоры Қанат Мусин оқуға үш негізгі өлшемге сәйкес келетін заңгерлер қабылданатынын айтты: 29 жасқа толған, жоғары заң білімі бар, заң мамандығы бойынша кемінде 5 жыл жұмыс өтілі бар адамдар. Егер талапкер осы үш параметрге сәйкес келсе, онда ол құжаттар тапсыра алады.
«Бұған дейін Мемлекет басшысы Қазақстан халқына Жолдауында сот жүйесі жабық корпорация бола алмайтынын, оған салық салу, жер қойнауын пайдалану, зияткерлік меншік, корпоративтік құқық саласындағы мамандар қажет екенін атап өткен болатын. Енді Академияда мемлекеттік тапсырыс шеңберінде жоғары оқу орнынан кейінгі білім беру бағдарламалары бойынша «Қазақстан Республикасының сот жүйесі және судьяларының мәртебесі туралы» Конституциялық заңда көзделген талаптарға сәйкес келетін азаматтар оқи алады», – деп түсіндірді спикер.
Қанат Мусиннің айтуынша, бұл сот жүйесіне өзекті құқықтық салалардан білікті мамандарды тартуға мүмкіндік береді және тұтастай алғанда, судьялар корпусының сапалы құрамын одан әрі арттыруға ықпал етеді. Академияның вице-ректоры атап өткендей, құжаттарды қабылдау мәселелеріне ерекше көңіл бөлінеді.
«Біз құжат тапсырушыларға үлкен мән береміз. Сондықтан біз үлкен кәсіптік бағдар беру жұмыстарын жүргізіп жатырмыз. Сот төрелігі академиясы қабылдау науқаны кезеңінде академиядағы оқу ерекшеліктерін, судьяның болашақ мамандығының ерекшеліктерін түсіндіру үшін барлық мемлекеттік органға барады», – деп қосты ол.
Құжаттарды қабылдау 1 маусымнан 29 шілдеге дейін жұмыс күндері офлайн режимінде де, «Электрондық үкіметтің» веб-порталы арқылы да жүзеге асырылады.
Түсуге арналған құжаттар тізбесі:
- жоғары білім туралы құжат;
- мемлекеттік қызметшілер болып табылатын адамдар үшін жұмыс орнынан жолдама және анықтама;
- өңірлік квота бойынша түсетін тұлғалар мен мемлекеттік қызметші болып табылмайтын тұлғалар үшін заң мамандығы бойынша еңбек қызметін растайтын құжат;
- 075/У нысанындағы медициналық анықтама.
