2025 жылы Қазақстан Арал теңізінің құрғаған ұлтанында экожүйені қалпына келтіру бойынша ауқымды жобаны жалғастыруда. Бұл жұмыстар «Таза Қазақстан» экологиялық акциясы аясында жүргізілуде, оның мақсаты – қоршаған орта жағдайын жақсарту және аймақтардың тұрақты дамуын қамтамасыз ету, деп хабарлайды No-comment.kz - ҚР Экология және табиғи ресурстар министрлігіне сілтеме жасап.
Жобаға КАТКО, француз мемлекеттік компаниясы «Orano Mining SA» мен «Қазатомөнеркәсіп» ҰАК» акционерлік қоғамының бірлескен кәсіпорны және басқа да ұлттық және жеке компаниялар белсенді қатысып, орман отырғызу жұмыстарын ұйымдастыруда. Жобаның негізгі мақсаты – жерлердің одан әрі деградациясының алдын алу, экологиялық жағдайды жақсарту.
Бүгінгі күнгі нәтижелер:
- 522 тонна тұқым жинақталды.
- 2024 жылғы 16-30 желтоқсан аралығында 12 000 гектарға егу жұмыстары жүргізілді.
- 2025 жылғы қаңтар мен ақпан айларында 108 000 гектарға егу жоспарлануда.
- 2025 жылғы наурызда 16 492 гектарға сексеуіл тұқымдас ағаштар отырғызу көзделген.
Бұл жоба Арал экологиялық апатының салдарымен күресу жөніндегі мемлекеттік стратегияның бір бөлігі болып табылады. Қазақстан экологиялық жағдайды жақсарту мақсатында ішкі және халықаралық деңгейде белсенді жұмыс істеуде.
